Na Carlos Claudio, Dar es Salaam.📍
Serikali imesema inaendelea kuimarisha programu za ukuzaji wa ujuzi kwa nguvu kazi na kuboresha upatikanaji wa huduma za umma, katika jitihada za kuimarisha ajira, mahusiano kazini na mifumo ya hifadhi ya jamii nchini.
Kauli hiyo imetolewa na Naibu Waziri katika Ofisi ya Waziri Mkuu (Kazi, Ajira na Mahusiano), Dkt. Evaline Wilbard Munisi, baada ya kutembelea mabanda ya taasisi za Serikali katika Maonesho ya 50 ya Kimataifa ya Biashara ya Dar es Salaam, maarufu Sabasaba.
Dkt. Munisi amesema taasisi zilizo chini ya wizara yake zinatumia maonesho hayo kutoa elimu kwa wananchi kuhusu sheria za kazi, afya na usalama mahali pa kazi, viwango vya chini vya mishahara na haki za wafanyakazi, sambamba na kutoa huduma mbalimbali kwa wananchi wanaotembelea mabanda hayo.
Amesema utoaji wa elimu ana kwa ana unasaidia kuongeza uelewa wa wananchi na kupunguza sintofahamu kuhusu masuala ya kazi, huku akiwapongeza watumishi wanaotoa huduma katika maonesho hayo kwa weledi na ubunifu wao.
Aidha, Dkt. Munisi amesema Serikali imeongeza msisitizo katika programu za kukuza ujuzi kwa vijana, ili kuwaandaa kukabiliana na mahitaji ya soko la ajira linalobadilika kwa kasi.
Amesema programu hizo zinaendelea kutekelezwa, huku akibainisha kuwa hivi karibuni alitembelea baadhi ya vyuo vya mafunzo ya ufundi na stadi ili kukagua maendeleo ya utekelezaji wake.
“Baada ya miaka michache tunaamini Tanzania haitahitaji tena kutegemea wataalamu kutoka nje katika maeneo mengi kwa sababu tunawaandaa wataalamu wetu hapa nchini,” amesema Dkt. Munisi.
Amesema mpango huo ni sehemu ya utekelezaji wa maono ya Samia Suluhu Hassan ya kujenga taifa lenye rasilimali watu wenye ujuzi, ubunifu na uwezo wa kushindana katika soko la ajira.
Pia amesisitiza umuhimu wa kudumisha mahusiano mazuri kazini na katika jamii kwa ujumla, akisema Serikali inaendelea kushirikiana na taasisi za dini, vyama vya siasa, mashirika yasiyo ya kiserikali na wadau wengine ili kuimarisha umoja wa kitaifa na mshikamano wa kijamii.
“Mahusiano mazuri ndiyo lango la maendeleo,” amesema, huku akiwahimiza Watanzania kuendelea kudumisha amani, umoja na ushirikiano.
Katika ziara hiyo, Dkt. Munisi ametembelea mabanda ya National Social Security Fund, Workers Compensation Fund, Occupational Safety and Health Authority na Commission for Mediation and Arbitration, ambako amejionea utoaji wa huduma mbalimbali kwa wananchi.
Amezitaka taasisi hizo kuendelea kuboresha huduma zao, hususan kwa kutumia mifumo ya kidijitali, ili kuwawezesha wananchi kupata taarifa na huduma kwa haraka.
Kwa upande wake, amesema matumizi ya mifumo ya kidijitali katika NSSF Tanzania yamerahisisha wanachama kupata taarifa za michango, mafao na huduma nyingine kwa wakati halisi.
Dkt. Munisi amewahimiza wananchi kutembelea banda la Ofisi ya Waziri Mkuu pamoja na mabanda mengine ya Serikali katika Maonesho ya Sabasaba, ili kupata huduma na taarifa mbalimbali zinazotolewa na taasisi za umma.
Maonesho ya Kimataifa ya Biashara ya Dar es Salaam ni miongoni mwa maonesho makubwa ya biashara Afrika Mashariki, yakileta pamoja taasisi za Serikali, sekta binafsi na washiriki kutoka ndani na nje ya nchi kuonyesha bidhaa, huduma na fursa za uwekezaji.
🚨Full Video Inapatikana Katika YOUTUBE Channel Yetu Ya WASHINDI MEDIA