Na Carlos Claudio, Dar es Esalaam.📍
Baraza la Ushauri la Watumiaji la Mamlaka ya Udhibiti wa Huduma za Nishati na Maji (EWURA CCC) linatumia Maonesho ya 50 ya Biashara ya Kimataifa ya Dar es Salaam, maarufu Sabasaba 2026, kutoa elimu kwa wananchi kuhusu haki za watumiaji, usalama na matumizi sahihi ya umeme, maji na gesi ya kupikia (LPG).
Akizungumza katika maonesho hayo, Ofisa Mwandamizi wa Masuala ya Watumiaji wa EWURA CCC, Lugiko L. Lugiko, amesema ushiriki wa baraza hilo unalenga kuwapatia watumiaji taarifa sahihi zitakazowawezesha kufanya maamuzi yenye uelewa na kufahamu vyema haki pamoja na wajibu wao wanapotumia huduma zinazodhibitiwa.
Amesema EWURA CCC hutoa elimu kwa watumiaji katika sekta za umeme, mafuta, gesi asilia, huduma za maji na usafi wa mazingira.
“Tunatambua kuwa mtumiaji mwenye taarifa sahihi ni mtumiaji mwenye uwezo wa kufanya maamuzi bora. Jukumu letu ni kuhakikisha watumiaji wanaelewa huduma wanazopokea, haki zao na wajibu wao wanapotumia huduma za nishati na maji,” amesema Lugiko.
Ametoa wito kwa watumiaji wa umeme kuhakikisha kazi zote za ufungaji wa miundombinu ya umeme zinafanywa na mafundi wenye leseni kutoka Energy and Water Utilities Regulatory Authority (EWURA), akisema mafundi wenye sifa husaidia kuhakikisha miunganisho inakuwa salama, inazingatia viwango na inapunguza upotevu wa umeme pamoja na hatari za hitilafu za umeme.
Lugiko pia amewashauri wananchi kutumia vifaa bora vya umeme na kufanya ukaguzi wa mifumo ya umeme majumbani kila baada ya miaka mitano. Ameonya kuwa nyaya mbovu na vifaa visivyo na ubora vinaweza kuongeza matumizi ya umeme, kuharibu vifaa vya nyumbani na kusababisha hatari za kiusalama.
Kuhusu huduma za maji, amewashauri watumiaji wanaopokea bili kubwa isiyo ya kawaida kwanza kuhakiki usomaji wa mita zao na kukagua maeneo yao kubaini kama kuna uvujaji wa maji kabla ya kuwasilisha malalamiko kwa mamlaka za maji.
“Watumiaji wengi hudhani bili kubwa zinatokana na makosa ya utozaji, wakati katika baadhi ya matukio tatizo huwa ni uvujaji wa maji ndani ya nyumba au kutokuhakiki usomaji wa mita,” amesema.
Aidha, Lugiko amesisitiza umuhimu wa kuzingatia usalama wa gesi ya kupikia, akiwashauri watumiaji kusafirisha mitungi ya gesi ikiwa imesimama wima na kuihifadhi katika maeneo yenye hewa ya kutosha ili kupunguza hatari ya uvujaji wa gesi.
Amesema EWURA CCC itaendelea kupanua kampeni za uhamasishaji kwa watumiaji ili kuwasaidia wananchi kupata taarifa sahihi na kutumia huduma za nishati na maji kwa usalama na ufanisi.